رباعيات صلاح جاهين

(1)





مـع إن كـل الخلق مـن أصـل طين


وكلهـــم بينزلــوا مغمضــين


بعـد الــدقايق والشــهور والســنين


تــلاقى ناس أشـرار وناس طيــبين





عـجبى !!






(2)





عجبى عليـك . . عجبى عليـك يا زمن


يـا بو البدع يا مبــكى عينى دماً


إزاى أنـا أختـار لـروحى طـريـق


وانا اللى داخـل فى الحيـاة مرغمـاً





عـجبى !!






(3)





مرغم عليـك يا صـبح مغصوب يا ليل


لادخلتهـا بـرجليا ولا كــانـلى ميل


شـايلنى شـيل دخلـت انا فى الحياة


وبكـره ح اخرج منهـا شـايلنى شـيل





عـجبى !!





(4)


سـنوات وفايته عليـا فـوج بعـد فـوج


واحـدة خـدتنى إبـن والتـانية زوج


والتـالتـة أب خـدتنى والـرابعة إيـه


إيه يعمـل إللى بيحدفـه مـوج لمـوج ؟





عـجبى !!






(5)


وانا فى الضـلام . . من غير شـعاع يهتكه


أقـف مـكـانى بخـوف ولا أتـركـه


ولمـا ييجى النـور واشـوف الـدروب


أحـــتــار زيـادة . . أيهـم أسـلكــه ؟





عـجبى !!






(6)





نظـرت فى الملـكوت كتيـر وانشـغلت


وبكل كلمـة (ليه ؟) و(عشانيه) سـألت


اسـأل سـؤال . . الرد يرجـع ســؤال


واخـرج وحيـرتى أشـد ممـا دخلـت





عـجبى !!





(7)





خـرج ابن آدم م العدم قلـت : يـاه


رجـع ابن آدم للعـدم قلت : يـاه


تـراب بيحيـا . . وحى بيصـير تراب


الأصـل هـو المـوت والا الحيـاة ؟





عـجبى !!






(8)


ضـريـح رخـام فيـه السعيـد انـدفن


وحفـره فيهـا شريـد من غـير كفـن


مـريت عليهـم . . قلـت يـا للعجـب


لاتنين ريحتهـم فيهـا نفـس العفـن





عـجبى !!






(9)


ياما صـادفت صـحاب وما صحبتهمش


وكاسـات خمـور وشراب ومـا شربتهمش


أنـدم على الفـرص الـلى انـا سبتهـم


والا على الفـرص اللى مـا سـبتهمش


عـجبى !!







(10)


والـكون ده كيف موجود من غير حـدود


وفـيـه عقـارب ليـه وتعـابين ودود


عـالـم مجـرب فـات وقـال سلامـات


ده ياما فيـه سـؤالات من غير ردود





عـجبى !!






(11)


غـدر الـزمان يـا قلبى مـا لهـوش أمـان


وحـاييجى يـوم تحتـاج لحبـة إيمـان


قلبى ارتجف وسـألنى . . أأمن بإيـه ؟


أأمـن بـإيـه محتـار بقـالى زمــان





عـجبى !!






(12)





يا باب أيا مقفـول . . إمـتى الدخـول


صـبـرت يـامـا واللى يصـبر ينـول


دقيت سـنين . . والرد يرجع لى : مين ؟


لو كنت عارف مين أنـا . . كنت أقـول





عـجبى !!






(13)





أنا شـاب لـكن عمـرى ولا ألف عـام


وحيـد ولـكن بين ضـلوعـى زحـام


خـايف ولـكن خـوفـى مـنى أنـا


أخـرس ولـكن قـلبـى مـليـان كـلام





عـجبى !!






(14)


أحـب اعيش ولـو أعيش فـى الغابـات


أصـحى كمـا ولـدتـنى أمـى وابـات


طـائر . . حوان . . حشرة . . بشر . . بس اعيش


محـلا الحيـاة . . حتى فى هيئـة نبـات





عـجبى !!






(15)


سهيـر ليـالى ويـامـا لفيـت وطفـت


وف ليلـه راجـع فى الضـلام قمـت شفت


الخـوف . . كأنـه كلـب سـد الطريق


وكـنـت عـاوز أقتـله . . بس خفـت





عـجبى





!!





(16)


كان فيه زمـان سحلية طـول فرسـخين


كهفين عيـونهـا وخشمهـا بـربخـيـن


ماتت . . لـكين الرعب لم عمـره مــات


مـع إنه فـات بدل التـاريـخ تاريخـين





عـجبى


!!






(17)





عجبـتـنى كـلمـة من كــلام الـورق


النـور شـرق من بين حـروفهـا وبـرق


حبيت أشيلها ف قلبى . . قالت حــرام


ده انـا كـل قلب دخلت فيـه اتحــرق





عـجبى !!






(18)


رقـبـة قـزازه وقلــبى فيهـا انـحشـر


شـربت كـاس واتنين وخـامـس عشـر


صـاحبت ناس م الخمرة ترجع وحـوش


وصـاحبت نـاس م الخمـرة ترجـع بشر





عـجبى !!






(19)


كل اللى فى الخمـارة صـابهم جنـون


صـبحوا الرجـال يتبـادلوا كاس المنـون


وبــدم ونبيـت انـكتب ع الجــدار


"يا ميت ندامة ع اللى قلبـه حنـون"





عـجبى !!






(20)





قـالـوا الشـقيق بيـمص دم الشــقيق


والنـاس مـا هيـاش نـاس بحـق وحقيق


قـلـبى رمـيتـه وجبت غيـره حـجـر


داب الحجـر . . . ورجعت قلـبى رقيق





عـجبى !!






(21)





يوم قلت آه . . سـمعونى قـالوا فسـد


ده كان جـدع قلبـه حـديـد واتحسـد


رديت على الـلايمين أنا وقلت . . آه


لـو تعـرفـوا معـنى زئـيـر الأسـد





عـجبى !!






(22)





بين موت وموت . . بين النـيران والنيران


ع الحبـل ماشـيين الشـجاع والجبـان


عجبى علادى حيـاة . . ويـا للعــجب


إزاى أنـا – يـاتخين – بقيت بهـلوان





عـجبى !!






(23)





أنا قـلبى كان شخشيخة أصـبح جـرس


جلجلت بـه صـحيوا الخـدم والحـرس


أنـا المـهرج . . قمتو ليـه خفتو ليـه


لاف إيدى سـيف ولا تحت مـنى فـرس





عـجبى !!






(24)





دخـل الـربيع يضـحـك لقـانى حـزين


نـده الربيـع على إسـمى لم قلت مـين


حـط الـربيع أزهـاره جـنبـى وراح


وإيش تـعمـل الأزهـار للمـيـتـيـن





عـجبى !!







(25)


مهبـوش بخـربـوش الألـم والضـياع


قـلـبى ومـنـزوع م الضـلوع انتـزاع


يا مرايتى يـا اللى بترسـمى ضـحكتى


يـا هلتـــرى ده وش والا قـنـاع





عـجبى !!






(26)


حبيـت . . لـكن حب من غير حنـان


وصـاحبت لـكن صـحبه مـا لهاش أمان


رحت لحــكيم واكـتر لقيت بـلوتـى


إن اللى جـوه القـلب مش ع اللسـان







عـجبى !!






(27)





لـيـه يا حبيبتى مـا بيننـا دايمـاً سـفر


ده البعـد ذنـب كـبـير لا يـغـتـفر


ليـه يـا حبيبتى مـا بيننـا دايمـاً بـحور


أعدى بـحـر ألاقـى غيـره اتـحـفـر





عـجبى !!






(28)


ورا كـل شـباك ألـف عين مفتـوحين


وانا وانـتى مـاشـيين يا غـرامى الحزين


لـو التصـقنا نمـوت بضـربة حجـر


ولـو افتـرقنـا نمــوت متـحسـرين





عـجبى !!





(29)


نـوح راح لحـالـه والطـوفـان اسـتمر


مـركبنـا تايهـة لسـه مش لاقيـة بـر


آه م الطـوفـان وآهيـن يـا بـر الأمـان


إزاى تبـان والـدنـيـا غـرقـانـة شـر





عـجبى !!





(30)


على رجلى دم . . نظـرت له مـا احتملـت


على إيـدى دم . . سـألت : ليـه ؟ لم وصلت


علـى كتفـى دم وحتـى علـى راسـى دم


أنـا كـلى دم . . قتـلت ؟ . . والا اتقتلت ؟





عـجبى !!





(31)


أنا كـل يـوم أسـمع . . فلان عذبوه


أسـرح فـى بغـداد والجزاير واتوه


مـا اعجبش م اللى يطيق بجسمه العـذاب


واعـجـب مـن اللى يـطـيق يعذب أخوه





عـجبى !!





(32)


ينـبوع وفـى الحـواديت أنا سـمعت عنه


إنه عجيب . . وف وسط لهـاليب لكنـه


شـقيت كمـا الـفرسـان طـريقى . . لقيت


حـتى الخـنازيـر والكـلاب شـربوا منـه





عـجبى !!





(33)


يـا قـرص شـمـس مـا لهش قبة سـما


يـا ورد مـن غـير أرض شـب ونـمـا


يـا أى مـعنى جـميل سـمعنا عـليـه


الخـلق لـيـه عـايشـين حـيـاه مؤلمـة





عـجبى !!


(34)


شــاف الطبيب جـرحـى وصـف له الأمـل


وعطـانـى مـنـه مقـام يـا دوب ما اندمـل


مجـروح جـديد يا طبيب وجـرحى لهـيب


ودواك فـرغ مـنى . . وإيــه العمـل ؟





عـجبى !!






(35)





أعـرف عيـون هى الجمـال والحسـن


واعـرف عيـون تـاخد القـلوب بالحضن


وعيون مخيفة وقـاسـية وعيـون كتيـر


وبـاحس فيهـم كـلهـم بـالحــزن





عـجبى !!





(36)





إيش تـطلبى يـا نفسـى فـوق كـل ده


حظــك بيضــحك وانـتى متنكـدة


ردت قـالت لـى النفس : قـول للبشـر


مـا يبصـوليش بعيـون حـزينـة كـده





عـجبى !!





(37)


إقلـع غمـاك يـا تـور وارفض تلـف


إكسـر تـروس السـاقيـة واشـتم وتف


قال : بس خطوة كمان . . وخطوة كمان . .


يا اوصـل نهـاية السـكة يا البير يجف





عـجبى !!





(38)


يا حـزين يا قمقـم تحت بحـر الضياع


حـزين أنـا زيـك وإيـه مسـتطـاع


الحـزن مـا بقالهـوش جـلال يا جـدع


الحـزن زى البـرد . . زى الصـداع





عـجبى !!





(39)





. . فى يـوم صـحيت شاعر براحة وصفا


الـهـم زال والـحـزن راح واخـتـفى


خـدنى العـجب وسـألـت روحى سـؤال


أنـا مت ؟ . . والا وصـلت للفلسـفه ؟





عـجبى !!





(40)


الفيـلسـوف قـاعد يفـكر سـيبوه


لا تعمـلوه سـلطان ولا تصـلبـوه


مـا تعـرفـوش إن الفلاسـفة يا هوه


اللى يقـولـوه بيـرجعوا يـكـدبوه ؟





عـجبى !!





(41)


على بعـد مليـون ميـل من أرضـنا


من الفـراغ الـكـونى بصـيت أنـا


لا شـفت فـرق مـا بين جبال أو بحور


ولا شـفت فـرق ما بين عـذاب أو هنا





عـجبى !!






(42)





إنسـان أيـا إنسـان مـا أجـهـلك


مـا أتفهـك فى الكـون ومـا أضـألـك


شمس وقـمـر وسـدوم ومـلايين نجـوم


وفـاكرهـا يـا مـوهـوم مخلوقـه لـك ؟





عـجبى !!





(43)





نـظرت فـوقى للنـجـوم وانـا سـايـر


رجليـا عتـرت فى الحفـر والحجـايـر


بـقيـت أقـول وانا ع التراب : يـا سـلام


مـش بـس عـبره أخـذت لـكن عبـاير





عـجبى !!






(44)





ـ يـا نـجم . . نـورك ليه كده بيرتجــف ؟


هــو انت قنـديل زيت ؟ . . أو تخـتلف ؟


ـ أنـــــا نـجـم عـالى . . بس عالى قوى


وكـــل مـا انــظر تحت اخـاف انحـدف






عـجبى !!





(45)


السـم لو كان فى الدواء . . منين يضر ؟


والمـوت . . ولـو لعـدونا . . منين يسـر ؟


حط القـلم فى الحبـر واكـتب كـمـان


. . والعبـد للشـهوات . . منين هـو حـر ؟





عـجبى !!





(46)


وقـفـت بـيـن شـطيـن على قـنـطرة


الـكـدب فين والصـدق فين يـا تـرى


محتار ح اموت . . الحـوت خرج لى وقال


هـو الـكــلام يتقـاس بـالمســطرة ؟





عـجبى !!






(47)





سـرداب فى مسـتشـفى الـولاده طـويـل


صـرخات عـذاب ورا كـل بـاب وعـويل


. . وفى الـطريق مـتزوقـين الـبنـات


مـتـزوقـيـن لـلحـب والـمـواويـل





عـجبى !!





(48)


الـدنـيـا أوده كـبـيره لـلانـتـظار


فـيهـا ابـن آدم زيـه زى الـحمـار


الـهـم واحد . . والمـلل مـشـترك


ومـفـيش حـمـار بيـحاول الإنتـحار





عـجبى !!





(49)


أيـوب رمـاه الـبـين بـكـل الــعلل


سـبع سـنين مـرضان وعـنـده شـلل


الصـبر طيـب . . صـبر أيـوب شـفـاه


بـس الأكـاده مـات بـفـعل الـمـلل





عـجبى !!





(50)


نسـمـة ربيع لكن بـتكـوى الـوشوش


طـيور جمـيلة بس مـن غيـر عشوش


قـلـوب بتخفق . . إنـمـا وحـدهـا


هـى الحياه كـده . . كلها فى الفـاشوش





عـجبى !!






(51)


يا طير يا عالى فى السـما طظ فيـك


مـا تفتـكـرشـى ربنـا مصـطفيـك


بـرضـك بتـاكل دود وللطيـن تـعود


تمص فيـه يـا حـلو . . ويمص فيك





عـجبى !!





(52)


كروان جـريح مضـروب شعـاع م القـمر


ســقط مـن السـموات فـؤاده انـكسـر


جـريت عليـه قطـه عشــان تـبلعـه


أتـاريـه خيـال شـعراء ومـالهوش أثـر





عـجبى !!





(53)





ياللى نصـحت الناس بشــرب النبيت


مع بنت حلوه . . وعود، وضحك، وحديت


مـش كنت تنصـحهم منين يكسـبوا


تمن ده كـله ؟ . . والا يمـكن نسـيت





عـجبى !!






(54)


مـا حد فى الدنيـا دى واخد جـزاته


ولا حـد بيفكـر فى غير لـذاذاتـه


مـاتعرفيش يا حبيبتى . . أنا وانتى مين ؟


إنتـى عـروس النيل . . وانا النيل بذاته





عـجبى !!






(55)


رقاصـة خرسـا ورقصه من غير نغم


دنيـا . . يا مين يصـالحها قبل النـدم


سـاعتن تهز بوجـههـا يعنـى لا


يترجـرجـوا نهـديهـا يعنـى نعـم





عـجبى !!






(56)


إخطـفنى ياللى تحـبنى ع الحصـان


الدنيا قالت يــوم فى مـاضى الزمان


إخطـفنى ياللى تحبنــى ع الفـرس


الدنيا قالت . . قم خطـفها الشــيطان





عـجبى !!






(57)


من بين شـقوق الشـيش وشقشقت لـك


مع شـهقة العصـافير وزقـزقت لـك


نهـار جـديد انا . . قوم نشـوف نعمليه


انا قلت يا ح تقتلنـى . . يا ح اقتـلك





عـجبى !!





(58)


قلبـى عليل يا ناس وفى الكـاس دواه


مـديت له إيـدى شـربت م اللى حـواه


جنبى الشـمال خف . . اليمين اتـوجـع


وإيـه يـداوى الــكبد م اللـى كـواه





عـجبى !!





(59)


. . دى مـذكرات وكـتبتهـا من سـنين


فى نـوتـه زرقـا لون بحـور الحنين


عترت فيهـا . . رميتهـا فى المهمـلات


وقلت أمـا صـحيح كـلام مـخبولـين





عـجبى !!



by admin

hamada